kisī parinde ne uḌne kā man banāyā hai

vo koī aur nahīñ merā hī to saaya hai

zamīñ kī muTThī meñ jaise ho āsmān koī

ġhazab kā reshmī ehsās koī laayā hai

guloñ meñ shoḳh gulābī tumhīñ ne rañg bhare

chale bhī aao ke gulshan ne ab bulāyā hai

ye merā gaañv har ik roz yuuñ damakne lagā

ke jugnuoñ ne yahāñ āshiyāñ banāyā hai

na.e se ḳhvāb churā luuñ hasīn lamhoñ se

yuuñ shabnamī sī kisī raat ne sulāyā hai

bharā bharā sā hī rahtā hai ye mirā man ab

mizāj vaqt ne tujh se ye ḳhuub paaya hai

milo kabhī bhī jo fursat meñ to ye pūchheñge

yuuñ mere chāñd ko mujh se hī kyuuñ churāyā hai