husn-e-be-parda kī garmī se kaleja pakkā
teġh kī aañch se ghar meñ mire khānā pakkā
jins-e-dil le ke na jā.ūñ maiñ kisī aur ke paas
aap bai.āna agar dījiye pakkā pakkā
har tarah haath uThānā hai jahāñ se mushkil
baiTh rahne ko bhī ghar chāhiye kachchā pakkā
hai vo shā.ir jo paḌhe bazm-e-suḳhan meñ ash.ār
mo'atabar hai jo kachehrī meñ ho chehra pakkā
ḳhām-e-taba.ī se tumhāre hai bahut tañg 'asīr'
kījiye vasl kā iqrār to pakkā pakkā