jaane lage haiñ ab dam-e-sard āsmāñ talak
ThanDī saḌak banī hai yahāñ se vahāñ talak
jalte haiñ ġham se jān-o-dil-o-sīna-o-jigar
chāroñ taraf hai aag bujhā.ūñ kahāñ talak
bīmār ho gayā huuñ maiñ qaht-e-sharāb se
lillāh le chalo mujhe pīr-e-muġhāñ talak
masjid se duur hai ye dukāñ mai-farosh kī
aatī nahīñ hai kaan meñ bāñg-e-azāñ talak
niklā jo dam to rāhat-o-ārām hai 'asīr'
āvārgī hai jism kī rūh-e-ravāñ talak