lagā hai aisā koī kāsa-e-savālī hoñ

ye aañkh jaise mirī raushnī se ḳhālī hoñ

ye kyā zarūrī hai ham saarī umr saath raheñ

nahīñ ye baat ki qadreñ ye lā-zavālī hoñ

na jaane kaun pas-e-chashm mar chukā hogā

vo āñkheñ jaise kisī maqbare kī jaalī hoñ

sadā se haiñ kisī nādīda guuñj kī taabe

ye bheḌeñ sabz pahāḌoñ ne jaise pā lī hoñ

hai ghāTī ghāTī koī zahr-ḳhand chup ho jaao

na jaane kaun se patthar yahāñ jalālī hoñ