fazā meñ zulf ke jaadū agar bikhar jaate

havā ke saath bahut log dar-ba-dar jaate

bhalā huā ki huī jins-e-ġham kī arzānī

ham apne daaġh dikhāne nagar nagar jaate

na jaltā koī charāġh-e-sadā to sab sar-e-shām

lipaT ke apne gharoñ ke sutūñ se mar jaate

ik aisā lamha-e-shām-e-ḳhizāñ bhī guzrā hai

mujhe jo dekhte is lamha tum to Dar jaate

hameñ na rok ravāñ haiñ misāl-e-pāra-e-abr

hamāre bas meñ jo hotā to ham Thahar jaate

'musavvir' aa ke na Thahrā koī bhī ḳhvāboñ meñ

udaas rātoñ kī āñkhoñ meñ rañg bhar jaate