roz dil meñ hasratoñ ko jaltā bujhtā dekh kar

thak chukā huuñ zindagī kā ye ravayya dekh kar

reza reza kar diyā jis ne mire ehsās ko

kis qadar hairān hai vo mujh ko yakjā dekh kar

kyā yahī mahdūd paikar hī haqīqat hai mirī

sochtā huuñ din Dhale ab apnā saaya dekh kar

kuchh talab meñ bhī izāfa kartī haiñ mahrūmiyāñ

pyaas kā ehsās baḌh jaatā hai sahrā dekh kar

mere ḳhvāboñ par bhī us ne naam apnā likh liyā

ab bhī kyuuñ ḳhāmosh huuñ maiñ ye tamāshā dekh kar

sach to ye hai sab ko apnī jaan pyārī hai yahāñ

uḌ ga.e saare parinde peḌ kaTtā dekh kar

'shād' jaane jī rahe ho kaun sī duniyā meñ tum

duniyā duniyā kar rahe ho ab bhī duniyā dekh kar