zamīñ pe rahte hue kahkashāñ se milte haiñ
hamāre rañg bhī ab āsmāñ se milte haiñ
hamāre haal kī bosīdgī pe mat jaao
ḳhazāne ab bhī purāne makāñ se milte haiñ
tirī qasam kā bhī ab kaise e'tibār kareñ
tire yaqīñ to hamāre gumāñ se milte haiñ
vafā ḳhulūs mohabbat hamārā hissa hai
har ek shaḳhs ko ye sab kahāñ se milte haiñ
gale na ham ko lagā.eñ ki aap jal jaa.eñ
hamāre zaḳhm bhī barq-e-tapāñ se milte haiñ