sonā thā jitnā ahd-e-javānī meñ so liye

ab dhuup sar pe aa ga.ī hai aañkh kholiye

yaad aa gayā jo apnā garebāñ bahār meñ

dāman se muñh lapeT liyā aur ro liye

ab aur kyā kareñ tire tark-e-sitam ke ba.ad

ḳhud apne dil meñ aap hī nashtar chubho liye

parvāna-e-rihā.ī-e-ḳhāma to mil gayā

lekin huzūr ab dar-e-zindāñ bhī kholiye

apne liye ta.ayyun-e-manzil koī nahīñ

jo bhiiḌ jis taraf ko chalī saath ho liye

thī nāgavār-e-tab.a tujhe sādgi-e-ishq

le aaj ham ne palkoñ meñ motī piro liye

har ik ba-zom-e-ḳhvesh jahāñ ho suḳhan-shanās

behtar ye hai 'sabā' ki vahāñ kuchh na boliye