sitam kī intihā par chal rahī hai
ye duniyā kis ḳhudā par chal rahī hai
diloñ par qahr kā mausam hai kaisā
mirī bastī duā par chal rahī hai
lahū se khelte haiñ sab farishte
siyāsat fātiha par chal rahī hai
zabāñ kaaTī ga.ī kis ḳhush-dahan kī
ki hujjat zā.iqa par chal rahī hai
badan meñ saañs letā hai samundar
marī kashtī havā par chal rahī hai
qanā.at hai kisī muflis kī biivī
riyāsat dāshta par chal rahī hai
ġhazal kī shā.erī ḳhurshīd-akbar
bisāt-e-marsiya par chal rahī hai