ye duniyā hai yahāñ aslī kahānī pusht par rakhnā
laboñ par pyaas rakhnā aur paanī pusht par rakhnā
tamannāoñ ke andhe shahr meñ jab māñgne niklo
to chādar sabr kī sadiyoñ purānī pusht par rakhnā
maiñ ik mazdūr huuñ roTī kī ḳhātir bojh uThātā huuñ
mirī qismat hai bār-e-hukmarānī pusht par rakhnā
tujhe bhī is kahānī meñ kahīñ khonā hai shahzāde
ḳhudā hāfiz ye mohr-e-ḳhāndānī pusht par rakhnā
hamesha vaqt kā dariyā ise raftār baḳhshegā
jise aatā ho dariyā kī ravānī pusht par rakhnā