na jaane shaam ne kyā kah diyā savere se
ujāle haath milāne lage añdhere se
shajar ke hisse meñ bas rah ga.ī hai tanhā.ī
har ik parinda ravāna huā basere se
jo us kī biin kī dhun par huā hai raqs-andāz
Thanī rahī hai usī saañp kī sapere se
abhī ye raushnī chubhtī huī hai āñkhoñ meñ
abhī ham uTh ke chale aa.e haiñ añdhere se
tumhārā shahr-e-nigārāñ to ḳhuub hai 'az.har'
bachā ke laa.e haiñ dil aarzū ke ghere se