paḌhiye sabaq yahī hai vafā kī kitāb kā
kāñTe karā rahe haiñ ta.āruf gulāb kā
kaisā ye intishār diyoñ kī safoñ meñ hai
kuchh to asar huā hai havā ke ḳhitāb kā
ye tai kiyā jo maiñ ne junūñ tak maiñ jā.ūñgā
ye marhala aham hai mire iztirāb kā
maanā bahut hasīn thā vo umr kā paḌāv
qissa magar na chheḌiye ahd-e-shabāb kā
'az.har' kahīñ se niiñd kā ab kiije intizām
yūñhī nikal na jaa.e ye mausam bhī ḳhvāb kā