tum ne kaisā ye rābta rakkhā

na mile ho na fāsla rakkhā

nahīñ chāhā kisī ko tere sivā

tū ne ham ko bhī pārsā rakkhā

phuul khilte hī khul ga.iiñ āñhkeñ

kis ne ḳhushbū meñ sāneha rakkhā

tū na rusvā ho is liye ham ne

apnī chāhat pe dā.era rakkhā

jhuuT bolā to umr bhar bolā

tum ne is meñ bhī zābta rakkhā

koī dekhe ye sādgī apnī

phuul yādoñ kā ik sajā rakkhā

'sād' uljhā rahā magar us ne

tujh se milne kā rāsta rakkhā