ye kyā vasvase ham-safar ho ga.e haiñ

sabhī rāste pur-ḳhatar ho ga.e haiñ

pukārā nahīñ tum ko ġhairat ne varna

ka.ī baar aakar idhar ho ga.e haiñ

na samjho hameñ kuchh shikāyat nahīñ hai

ki ḳhāmosh kuchh soch kar ho ga.e haiñ

kise ho ḳhabar dard-e-pinhāñ kī ai dil

jinheñ thī ḳhabar be-ḳhabar ho ga.e haiñ

ham apnī tabāhī pe bas muskurā.e

magar dāman-e-ġhair tar ho ga.e haiñ

tire bin hameñ maut bhī to na aa.ī

judā.ī ke din bhī basar ho ga.e haiñ