merā bachpan hī mujhe yaad dilāne aa.e
phir hathelī pe koī naam likhāne aa.e
aa ke chupke se koī chīḳh paḌe kānoñ meñ
gudgudāne na sahī aa.e Darāne aa.e
luuT le aa ke mirī sub.h kī mīThī nīndeñ
maiñ kahāñ kahtā huuñ vo mujh ko jagāne aa.e
mere āñgan meñ na jugnū haiñ na titlī na gulāb
koī aa.e bhī to ab kis ke bahāne aa.e
der tak Thahrī rahī palkoñ pe yādoñ kī barāt
niiñd aa.ī to ka.ī ḳhvāb suhāne aa.e