ḳhud se uktā.e hue apnā burā chāhte haiñ
bas ki ab ahl-e-vafā tark-e-vafā chāhte haiñ
un ke īmāñ pe rahā hai tirī qudrat kā madār
yahī ushshāq jo ma.atūb huā chāhte haiñ
ham ki ḳhud-soz haiñ jiine nahīñ dete ḳhud ko
tū mayassar hai to kuchh tere sivā chāhte haiñ
pattharo aao ki nādim haiñ shabīheñ ḳhud par
aa.ine apnī jasārat kī sazā chāhte haiñ
zindagī zabt kī qaa.il hai ki suntī hī nahīñ
aise zaḳhmoñ kī sadā.eñ jo davā chāhte haiñ