aa gayā īsār mere halqa-e-ahbāb meñ
phir kisī sho.ale ne paa.ī hai numū barfāb meñ
kah rahī hai sāhiloñ se Dūbne vaale kī laash
maiñ ne paayā hai sukūñ ik muztarib girdāb meñ
kaañp uTThā huuñ varūd-e-bārish-e-mau.ūda par
ġharq hone ko hai saarā shahar sail-e-āb meñ
mere hāthoñ meñ agar taqdīr-e-sub.h-o-shām ho
titliyāñ ta.abīr kī rakh duuñ kitāb-e-ḳhvāb meñ
ḳhaak ke putle ne āḳhir kar diyā ifshā use
dafan thā jo raaz ab tak sīna-e-mahtāb meñ
sāmne kī chiiz meñ 'āsif' nahīñ koī kashish
tak na yuuñ hairat se apne aks ko tālāb meñ