phūloñ se hogī dhuul judā dekhte raho

manzar nikhār degī havā dekhte raho

lā.egī rañg laġhzish-e-pā dekhte raho

manzil bhī degī apnā patā dekhte raho

haañ bazm meñ kisī ke garebān-e-gosh tak

pahuñchegā merā dast-e-sadā dekhte raho

nīndoñ meñ kho ke sīpiyāñ ḳhvāboñ kī dosto

chunñe ko hai ye dīda-e-vā dekhte raho

kab āftāb-e-tāza kī pahlī shuā se

hotī hai chaak shab kī ridā dekhte raho

us kaj-adā kī samt ba-īñ jaur-e-mustaqil

'āsif' ba-tarz-e-ahl-e-vafā dekhte raho