baat koī ek pal us ke dhyān ke aane kī thī

phir ye mīThī niiñd us ke zahr ban jaane kī thī

aañkh ho ojhal to phir kohsār bhī ojhal haiñ sab

ik yahī sūrat tire dukh dard bahlāne kī thī

duur tak phaile hue paanī pe naav thī kahāñ

ye kahānī ā.inoñ par aks lahrāne kī thī

DhūñDhtī thiiñ shaam kā pahlā sitāra laḌkiyāñ

khel kyā thā bas ye ik ḳhvāhish kahīñ jaane kī thī

dastakeñ detā thā akasr shaam kā ThanDā charāġh

aur ye dastak kisī ke lauT kar aane kī thī