vo mere shahr meñ aayā munāfiqat kyā hai
ye us ne aa ke batāyā munāfiqat kyā hai
mire ḳhulūs ko samjhā gayā hai nādānī
fareb sāmne khāyā munāfiqat kyā hai
sabhī ko ilm hai Dasnā hai saañp kī fitrat
phir is meñ us kī ḳhudāyā munāfiqat kyā hai
vo phir se haath milāne ko mere paas aayā
savāl maiñ ne uThāyā munāfiqat kyā hai
simaT ke baiTh gayā huuñ maiñ ek kone meñ
mirī samajh meñ jo aayā munāfiqat kyā hai
zamīn achchhī lagī sher kahne kī ḳhātir
so maiñ radīf ye laayā munāfiqat kyā hai