arsh ke taare toḌ ke laa.eñ kāvish log hazār kareñ
'mīr' kī baat kahāñ se paa.eñ āḳhir ko iqrār kareñ
aap ise husn-e-talab mat samjheñ nā kuchh aur shumār kareñ
sher ik 'mīr' faqīr kā ham jo aap ke gosh guzār kareñ
aaj hamāre ghar aayā lo kyā hai jo tujh pe nisār kareñ
illā khīñch baġhal meñ tujh ko der talak ham pyaar kareñ
kab kī hamāre ishq kī naubat qais se aage jā pahuñchī
rasman log abhī tak us marhūm kā zikr azkār kareñ
durj-e-chashm meñ ashk ke motī le jaane haiñ un ke huzūr
chokhā rañg lahū kā de kar aur unheñ shahvār kareñ
diin o dil o jaañ sab sarmāya jis meñ apnā sarf huā
ishq ye kārobār nahīñ kyā aur jo kārobār kareñ
jitne bhī dil-rīsh haiñ us ke sab ko naame bhej bulā
us be-mehr vafā dushman kī yādoñ kā darbār kareñ