zaḳhm ab tak vahī siine meñ liye phirtā huuñ
kuufe vāloñ ko madīne meñ liye phirtā huuñ
jaane kab kis kī zarūrat mujhe paḌ jaa.e kahāñ
aag aur ḳhaak safīne meñ liye phirtā huuñ
ret kī tarah phisalte haiñ mirī āñkhoñ se
ḳhvāb aise bhī ḳhazīne meñ liye phirtā huuñ
ek nākām mohabbat mirā sarmāya hai
aur kyā ḳhaak dafīne meñ liye phirtā huuñ
dil pe likkhā hai kisī aur parī-zād kā naam
naqsh ik aur nagīne meñ liye phirtā huuñ
is liye sab se alag hai mirī ḳhushbū 'āmī'
mushk-e-mazdūr pasīne meñ liye phirtā huuñ