phūloñ meñ vo ḳhushbū vo sabāhat nahīñ aa.ī
ab tak tire aane kī shahādat nahīñ aa.ī
mausam thā numā.ish kā magar aañkh na kholī
jānāñ tire zaḳhmoñ ko siyāsat nahīñ aa.ī
jo ruuh se āzār kī mānind lipaT jaa.e
ham par vo ghaḌī ai shab-e-vahshat nahīñ aa.ī
ai dasht-e-anal-haq tire qurbān abhī tak
vo manzil iz.hār-e-sadāqat nahīñ aa.ī
ham log ki haiñ maaoñ se bichhḌe hue bachche
hisse meñ kisī ke bhī mohabbat nahīñ aa.ī
ham ne to bahut harf tirī mad.h meñ soche
afsos ki sunvā.ī kī naubat nahīñ aa.ī
larze bhī nahīñ shahr ke hassās dar-o-bām
dil raakh hue phir bhī qayāmat nahīñ aa.ī
'sājid' vo sahar jis ke liye raat bhī roī
aa.ī to sahī hasb-e-zarūrat nahīñ aa.ī