kisī ne dil ke taaq par jalā ke rakh diyā hameñ

magar havā-e-hijr ne bujhā ke rakh diyā hameñ

hazār ham ne zabt se liyā thā kaam kyā kareñ

kisī ke āñsuoñ ne phir rulā ke rakh diyā hameñ

hamārī shohrateñ ḳharāb is tarah bhī us ne kiiñ

ki apne āshnāoñ se milā ke rakh diyā hameñ

hameñ is anjuman meñ jaane us ne kyuuñ bulā liyā

bulā liyā aur ik taraf biThā ke rakh diyā hameñ

faqat ham ek dekhne kī chiiz ban ke rah ga.e

kisī ne aisā ishq meñ banā ke rakh diyā hameñ

ham 'e.atibār' us kī har shikast meñ sharīk the

magar bisāt se alag uThā ke rakh diyā hameñ