ġhuncha jo sar-e-shāḳh chaTakte hue dekhā
pahlū meñ bahut dil ko dhaḌakte hue dekhā
mehñdī-rache hāthoñ ne uThāyā hī thā ghūñghaT
ik shola-e-javvāla lapakte hue dekhā
vo tere bichhaḌne kā samāñ yaad jab aayā
biite hue lamhoñ ko sisakte hue dekhā
bhūlā nahīñ ehsās tire lams kī ḳhushbū
tanhā.ī meñ anfās mahakte hue dekhā
khīñche hue ab tiir kamāñ meñ hai vo bālak
āġhosh meñ jis ko na humakte hue dekhā
jab jab bhī charāġhoñ kī laveñ ham ne baḌhā.īñ
kyā kyā na havāoñ ko sanakte hue dekhā