har aa.ine meñ badan apnā be-libās huā
maiñ apne zaḳhm dikhā kar bahut udaas huā
jo rañg bhar do usī rañg meñ nazar aa.e
ye zindagī na huī kāñch kā gilās huā
maiñ kohsār pe bahtā huā vo jharnā huuñ
jo aaj tak na kisī ke laboñ kī pyaas huā
qarīb ham hī na jab ho sake to kyā hāsil
makān donoñ kā har-chand paas paas huā
kuchh is adā se milā aaj mujh se vo 'shāhid'
ki mujh ko ḳhud pe kisī aur kā qayās huā