zamīñ pe chal na sakā āsmān se bhī gayā
kaTā ke par ko parinda uḌaan se bhī gayā
kisī ke haath se niklā huā vo tiir huuñ jo
hadaf ko chhū na sakā aur kamān se bhī gayā
bhulā diyā to bhulāne kī intihā kar dī
vo shaḳhs ab mire vahm o gumān se bhī gayā
tabāh kar ga.ī pakke makān kī ḳhvāhish
maiñ apne gaañv ke kachche makān se bhī gayā
parā.ī aag meñ kuudā to kyā milā 'shāhid'
use bachā na sakā apnī jaan se bhī gayā