tum se milte hī bichhaḌne ke vasīle ho ga.e

dil mile to jaan ke dushman qabīle ho ga.e

aaj ham bichhḌe haiñ to kitne rañgīle ho ga.e

merī āñkheñ surḳh tere haath piile ho ga.e

ab tirī yādoñ ke nishtar bhī hue jaate haiñ kund

ham ko kitne roz apne zaḳhm chhīle ho ga.e

kab kī patthar ho chukī thiiñ muntazir āñkheñ magar

chhū ke jab dekhā to mere haath giile ho ga.e

ab koī ummīd hai 'shāhid' na koī aarzū

aasre TuuTe to jiine ke vasīle ho ga.e