mohabbat kī galī se ham jahāñ ho kar nikal aa.e

ġhazal kahne ke tab se ḳhud-ba-ḳhud manzar nikal aa.e

hamāre haal par koī bhī hotā jī nahīñ paatā

ġhazal ne haath jab pakḌā to ham bach kar nikal aa.e

ye sarkārī mahal bhī kis qadar kachche nikalte hai

zarā bārish huī buniyād ke patthar nikal aa.e

sifārish ke binā jab bhī chale ham hasrateñ le kar

huī jab shaam to māyūs apne ghar nikal aa.e

zarā sī der ham ne narm lahja kyā kiyā apnā

hamāre dushmanoñ ke kaise kaise par nikal aa.e