zindagī meñ pyaar kā saudā karo

achchhā gāhak ho to bik jaayā karo

parbatoñ ke paar rahtā hai vo chāñd

jab añdherā ho to mil aayā karo

is tarah tum ko junūñ ho jā.egā

shab ga.e uTh uTh ke mat royā karo

ek din vo ḳhud hī bhāgā aa.egā

raat jab so jaa.e tum jaagā karo

din Dhale kuchh aur ghabrātā hai dil

shaam se pahle chale aayā karo

kab talak ye rat-jage bedāriyāñ

raat jab aa.e to so jaayā karo

raat ko aaseb dete haiñ sadā

bhaTkī rūhoñ se na kuchh bolā karo

tīrgī meñ nuur aa.egā nazar

Dūbte sūraj ko bhī sajda karo

ab amānat huuñ maiñ 'hasrat' aur kī

mere baare meñ na kuchh sochā karo