us but se jo milne kī tadbīr nazar aa.ī

bantī huī kuchh apnī taqdīr nazar aa.ī

chhup chhup ke zamāne se kyuuñ ashk-ravānī hai

shāyad ki mohabbat meñ tāsīr nazar aa.ī

jiine kā maza kyā hai jab maut hī rūThī ho

jis samt qadam uTThe zanjīr nazar aa.ī

jab ālam-e-vahshat meñ apne ko bhulā baiThā

anjām-e-mohabbat kī taqsīr nazar aa.ī

paimāna-o-mīnā kī sūrat meñ 'ra.īs' āḳhir

TuuTī huī tauba kī tasvīr nazar aa.ī