achchhe-ḳhāse log bure ho jaate haiñ
jāgne kā da.avā kar ke so jaate haiñ
shahr kā bhī dastūr vahī jañgal vaalā
khojne vaale hī akasr kho jaate haiñ
dīvānoñ kī ghaat meñ baiThne vaale log
sunte haiñ ik din pāgal ho jaate haiñ
us kī galī meñ jā kar us se uljheñge
saath agar honā hai ho lo jaate haiñ
ham jaisoñ ko hairat bhī hotī hogī
ek idhar aatā hai udhar do jaate haiñ
himmat haar ga.e to baazī haar ga.e
lauT jā tū bhī ham bhī ghar ko jaate haiñ