sunā hai is taraf kā ruḳh kareñge
tire dushman mirī jānib baḌheñge
kisī se kuchh na pūchhā kuchh na jaanā
ye dhabbe ḳhuun ke kaise dhuleñge
bahut haiñ chaar din ye zindagī ke
kabhī ran meñ kabhī ghar meñ raheñge
masīhāoñ ko ab zahmat na hogī
ham un ke aate aate mar chukeñge
kahāñ jaate haiñ ghabrā.e hue log
ki sahrā meñ to dīvāne raheñge
abhī marne kī jaldī hai 'ibādī'
agar zinda rahe to phir mileñge