musāfir rāste meñ hai abhī tak
nahīñ pahuñchā ujālā tīrgī tak
guloñ meñ chāñd khilne ke ye din haiñ
magar khiltī nahīñ hai ik kalī tak
zarā sā dard aur itnī davā.eñ
pasand aa.ī nahīñ chāragarī tak
barahna jism par do-chār dhabbe
tamāshā dekhte haiñ ajnabī tak
vo aisī qīmtī shai bhī nahīñ thī
luTī to yaad aatī hai abhī tak
likhā ḳhanjar se terā naam dil par
hameñ aatī nahīñ dīvāngī tak
use tasvīr karne kī lagan meñ
'ibādī' bhuul baiThe ḳhud-kushī tak