zamīn tañg hai yārab ki āsmān hai tañg

ye kyā ki bandoñ pe paiham terā jahān hai tañg

mire savāl kā koī javāb kyā detā

ki tere shahr meñ har shaḳhs kī zabān hai tañg

karūñ to kaise karūñ harf-e-mudda.ā āġhāz

ġhazal ke vāste lafzoñ kā āsmān hai tañg

fazā meñ uḌte parinde kī ḳhair ho yārab

ki us kā tiir baḌā hai magar kamān hai tañg

nizām nau meñ na.e tajrabāt kaise kareñ

dil-o-dimāġh kī har shaḳhs ke uḌaan hai tañg

mire ḳhudā use āzād kar ye achchhā hai

hisār-e-jism meñ har vaqt merī jaan hai tañg

agarche ḳhud vo bahut tañg-zehan-o-dil hai magar

amīr-e-shahr ko duniyā kā har makān hai tañg

parinde chīḳh rahe haiñ ye kis kī hijrat par

ye kis ke vāste yārab terā jahān hai tañg

sukūñ-navāz haiñ TuuTī haveliyāñ lekin

ye aur baat ki shīshe kā bhī makān hai tañg

kise sunā.ūñ maiñ apnī shikast kā qissa

vo lafz aur vo lahja vo dāstān hai tañg