aañkh se aañsū Tapkā hogā

sub.h kā taarā TuuTā hogā

phail ga.ī hai nuur kī chādar

ruḳh se āñchal sarkā hogā

phail ga.e haiñ raat ke saa.e

aañkh se kājal Dhalkā hogā

bikhrī pattī dekh ke gul kī

kaliyoñ ne kyā kyā sochā hogā

dekh musāfir bhuut nahīñ hai

raah kā patta khaḌkā hogā

āriz-e-gul pe dekh ke shabnam

kaliyoñ ne muñh dhoyā hogā

chup chup rahnā Thiik nahīñ hai

baat baḌhegī charchā hogā

ghuum rahe haiñ shahroñ shahroñ

koī to āḳhir tum sā hogā

aaj kuaañ bhī chīḳh uThā hai

kisī ne patthar maarā hogā

phail ga.ī hai pyaar kī ḳhushbū

koī patiñgā jaltā hogā

mujh se naata toḌ ke sāhil

vo bhī ab pachhtātā hogā