aise gum-sum vo sochte kyā the
jaane yāroñ ke faisle kyā the
ham to yuuñ hī ruke rahe varna
apne aage vo fāsle kyā the
bojh dil kā utārnā thā zarā
varna tum se hameñ gile kyā the
sahrā sahrā liye phire ham ko
vo junūñ ke bhī silsile kyā the
duur tak thī na gar koī manzil
phir vo ujle nishān se kyā the
ham hī the jo yaqīn kar baiThe
varna un ke vo mo.ajize kyā the
sar-phire the ki masḳhare yaaro
jo hameñ yuuñ liye phire kyā the