be-basar āfāt se taklīf hotī hai mujhe
sar-phire hālāt se taklīf hotī hai mujhe
jo mire dushman ko samjhā kar ga.ī kam-zarf hai
ya.anī kis kis baat se taklīf hotī hai mujhe
aaj bairūn-e-qafas sayyād kī parvā nahīñ
aap apnī zaat se taklīf hotī hai mujhe
jashn kar merī tabāhī par koī shikva nahīñ
bas tirī auqāt se taklīf hotī hai mujhe
ham-nashīnī se tirī har shab bahut shīrīn thī
juz tire ab raat se taklīf hotī hai mujhe
zulm kā aadī huuñ zanjīrī mirī pahchān hai
ḳhud lagā.ī ghaat se taklīf hotī hai mujhe