umr guzrī hai kāmrānī se

koī shikva nahīñ javānī se

misl-e-ādam hai be-gharī apnī

kaun Dartā hai be-makānī se

yuuñ musalsal azaab jhelā hai

ashk lagne lage haiñ paanī se

ham hī kirdār the kahānī ke

ham hī bāhar hue kahānī se

sach chhupānā muhāl hai sāhab

jhuuT se yā ki lan-tarānī se

kyā vo pariyāñ qamar-asīr huiiñ

sunte aa.e the ham jo naanī se

zulmatoñ meñ bhī hans ke khul jaanā

us ne sīkhā hai rāt-rānī se

bāñjh āñkheñ huiiñ magar 'zākir'

ḳhvāb aate rahe ravānī se