atvār tire ahl-e-zamīñ se nahīñ milte

andāz kisī aur hasīñ se nahīñ milte

un kī bhī ba-har-hāl guzar jaatī haiñ rāteñ

jo log kisī zohra-jabīñ se nahīñ milte

tum mehr sahī maah sahī ham se milo to

kyā ahl-e-mahak ahl-e-zamīñ se nahīñ milte

ai hazrat-e-dil un se banī hai na banegī

kyuuñ aap kisī aur hasīñ se nahīñ milte

'mirzā' ko bhī pardā nahīñ vālā-manashoñ kī

achchhā hai jo us ḳhāk-nashīñ se nahīñ milte