kyuuñ na rah paa.e is jahāñ se pare
aur bhī the jahāñ yahāñ se pare
ham jahāñ paas tere aa baiThe
tū uThā ho gayā vahāñ se pare
talḳhiyāñ aur baḌh ga.iiñ dil kī
jab huiiñ talḳhiyāñ zabāñ se pare
ye jo tū merī rah meñ haa.il hai
jaane kab hogā darmiyāñ se pare
maiñ to apne bhī ās-pās nahīñ
aur ho jā.ūñ maiñ kahāñ se pare
mujh pe saaya na Dāliye apnā
mujh ko rahnā hai sā.ebāñ se pare
ishq vo mār-e-āstīñ jis kā
zahr utrā hai jism-o-jāñ se pare
maar kar Daal de jo chhāñv meñ
ham bhale aise mehrbāñ se pare
yuuñ to vīrāñ hai āshiyāñ bhī magar
ḳhaak uḌā.eñge āshiyāñ se pare
ham jo kaasa uThā.e aa baiThe
ab karo ham ko āstāñ se pare