ye aur baat terī galī meñ na aa.eñ ham
lekin ye kyā ki shahr tirā chhoḌ jaa.eñ ham
muddat huī hai kū-e-butāñ kī taraf ga.e
āvārgī se dil ko kahāñ tak bachā.eñ ham
shāyad ba-qaid-e-zīst ye saa.at na aa sake
tum dāstān-e-shauq suno aur sunā.eñ ham
be-nūr ho chukī hai bahut shahr kī fazā
tārīk rāstoñ meñ kahīñ kho na jaa.eñ ham
us ke baġhair aaj bahut jī udaas hai
'jālib' chalo kahīñ se use DhūñDh laa.eñ ham