kyā batā.eñ kahāñ kahāñ the phuul

ḳhaak uḌtī hai ab jahāñ the phuul

bhīgī bhīgī sī dekh kar kaliyāñ

muskurā.e jahāñ jahāñ the phuul

dil meñ gulshan khilā ga.e kyā kyā

yuuñ to do din ke mehmāñ the phuul

jab ḳhizāñ aa.ī jaañ pe khel ga.e

mahram-e-jehd-e-be-karāñ the phuul

jis ne toḌā usī ko rañj huā

misl-e-paimāna-e-muġhāañ the phuul

din kī zulmat-nasīb bastī meñ

rāhgīroñ kī kahkashāñ the phuul