ab kahāñ le ke chhupeñ uryāñ badan aur tan jalā

dhuup aisī hai ki saa.e se bhī pairāhan jalā

chhīn lo ehsās mujh se chhīn lo merā shu.ūr

is ghaTā meñ tan phuñkā is raushnī se man jalā

zindagī dasht-e-sarāb aur sar pe ik sūraj muhīt

maiñ to maiñ huuñ mere saa.e kā bhī sab tan man jalā

kis sadā kī zarb se TuuTā sukūt-e-sañg-e-dasht

ek chiñgārī uḌī saarā kā saarā ban jalā

dil jo thā siine meñ bach sakte the kab ahl-e-ḳhirad

shahr meñ ik shor thā dāman jalā dāman jalā

dil-dukhoñ kī ḳhaak par kī shab-nashīnī maah ne

din kabhī niklā to ik sūraj sar-e-madfan jalā

tīrgī kī āñdhiyāñ uThtī rahīñ har nuur se

ik charāġh aisā hai siine meñ ki be-roġhan jalā

rafta rafta ho ga.e dast-e-talab ahl-e-junūñ

rāstoñ par sab liye baiThe haiñ ik dāman jalā

ghuT ke rah saktī thī kab tak ātish-e-rañg-e-bahār

zarb-e-mausam bhī kuchh aisī thī ki sab gulshan jalā

jal gayā to kyā huā āḳhir to maiñ kundan huā

ham-nashīñ dāman kī kyā jab man jalā dāman jalā