aag thī aisī ki armāñ jal ga.e
dil ke kāġhaz āñsuoñ meñ gal ga.e
rañg hai ḳhushbū bhī hai saaya bhī hai
kis nagar ''ai peḌ tere phal ga.e
khet kī miTTī ko vīrāñ dekh kar
gaañv vaale DhūñDne bādal ga.e
sah chukī sab dhuup paanī ke azaab
zindagī āḳhir tire kas-bal ga.e
jāgtī āñkheñ thiiñ apnī aur ham
ḳhvāb ke āñgan meñ pal do pal ga.e
jehl kā saaya qad-āvar jab huā
khoTe sikke har taraf phir chal ga.e
shahr ke sapne sajāne ai 'sadaf'
be-tahāshā dauḌte jañgal ga.e