shikve kī chubhan mujh ko sadā achchhī lagī hai

ye fart-e-mohabbat kī adā achchhī lagī hai

ḳhālī hai kahāñ lutf se ab dil kā pighalnā

pur-dard zamāne kī fazā achchhī lagī hai

lamhāt-e-mohabbat sabhī yaksāñ nahīñ hote

ai jān-e-vafā terī jafā achchhī lagī hai

mahfil meñ shanāsā bhī banā baiThā hai anjān

us shaḳhs kī majbūr vafā achchhī lagī hai

niklegā usī parde se taptā huā sūraj

ye soch ke hī kaalī ghaTā achchhī lagī hai

tū band kiye kaan jo suntī hai sabhoñ kī

sach-much ye 'sadaf' terī adā achchhī lagī hai