vo pīpal ke tale TuuTī huī mehrāb kā manzar

dikhā detā hai mujh ko ik dil-e-betāb kā manzar

chalā kar kāġhzī kashtī koī ma.asūm hañstā thā

bahut hī ḳhūb-sūrat thā kabhī tālāb kā manzar

safar vo mutma.in kartā rahā biphre samundar meñ

ki us ke zehn meñ ubhrā na thā girdāb kā manzar

thapeḌoñ meñ bhī sar mahfūz haiñ pakke makānoñ ke

tum āñkheñ khol kar dekho zarā sailāb kā manzar

aqīdat se bahā.e phuul yuuñ jhuk kar pujāran ne

ki rañgīñ ho gayā dariyā meñ ik girdāb kā manzar

sukūñ rāhat tabassum giit sāñsoñ meñ ghulī ḳhushbū

'sadaf' lagtā hai mujh ko ye anokhe ḳhvāb kā manzar