harf-e-dil nā-rasā hai tire shahr meñ
har sadā be-sadā hai tire shahr meñ
koī ḳhushbū kī jhankār suntā nahīñ
kaun sā gul khilā hai tire shahr meñ
kab dhanak so ga.ī kab sitāre bujhe
koī kab sochtā hai tire shahr meñ
ab chanāroñ pe bhī aag khilne lagī
zaḳhm lau de rahā hai tire shahr meñ
jitne patte the sab hī havā de ga.e
kis pe takiya rahā hai tire shahr meñ
ek dard-e-judā.ī kā ġham kyā kareñ
kis maraz kī davā hai tire shahr meñ
ab kisī shahr kī chaah baaqī nahīñ
dil kuchh aisā dukhā hai tire shahr meñ