saudā-e-ishq ke to ḳhatā-vār ham nahīñ
haiñ ishq ke marīz gunahgār ham nahīñ
ham jo khaTak rahe the tumhārī nigāh meñ
lo ab tumhārī raah meñ dīvār ham nahīñ
us kī ḳhushī ke vāste ḳhud ko fanā kiyā
phir bhī vo kah rahā hai vafādār ham nahīñ
dil meñ hamāre ek talātum sā hai bapā
ḳhāmosh haiñ ki zīnat-e-aḳhbār ham nahīñ
tanhā.iyoñ kī ham ne hī duniyā basā.ī hai
goshe meñ ḳhud ke haiñ sar-e-bāzār ham nahīñ
sahrā ke gard-o-garm hī ab raas aa ga.e
'sīmā' kisī chaman ke ravādār ham nahīñ