jo mire dil meñ hai logoñ se chhupā.ūñ kis tarah

kāñch ke is shahar ko 'ḳhālid' bachā.ūñ kis tarah

tū to pahle se bhī ab ma.asūm hai mere liye

maiñ tirī izzat ko miTTī meñ milā.ūñ kis tarah

apnā paikar bhī mujhe zindāñ nazar aane lagā

kashmakash meñ huuñ rihā.ī ḳhud se pā.ūñ kis tarah

maiñ kisī ke adl kī TuuTī huī zanjīr huuñ

mujh pe jo biitī hai duniyā ko batā.ūñ kis tarah

dekh kis aks-e-muqābil jism patthar ho gayā

chhoḌ kar ab ā.ina-ḳhāne ko jā.ūñ kis tarah

jāgte lamhoñ kī zanjīroñ meñ huuñ jakḌā huā

ḳhvāb kī dīvār ke saa.e meñ aa.uuñ kis tarah

ratjagoñ ke shahar meñ jā kar use kyā ho gayā

vo to kahtā thā ki maiñ tujh ko bhulā.ūñ kis tarah